Welcome to NIRBHAYAM.COM | Kerala’s No. 1 News Portal
December 8, 2025 4:53 am
Published on January 30, 2018 at 1:10 pm
സൂക്ഷിച്ച് ഉപയോഗിച്ചോളൂ; പുതിയ നോട്ട് കേടായാല് ഇനി ബാങ്കുകളില് നിന്ന് മാറ്റിക്കിട്ടില്ല
കയ്യിലുള്ള പുതിയ നോട്ടുകള് പൊന്നുപോലെ നോക്കിക്കോളൂ. ഇനി നോട്ടിനെന്തെങ്കിലും സംഭവിച്ചാല് ആ കാശു പോയെന്ന് വിചാരിച്ചാല് മതി.
കീറിയതോ മഷിപുരണ്ടതോ ആയ പുതിയ സീരീസ് നോട്ടുകള് ബാങ്കുകള് മാറി നല്കില്ലെന്നാണ് റിപ്പോര്ട്ടുകള്. പുതിയ സീരീസിലുള്ള 2,000, 500, 200, 50 രൂപ നോട്ടുകളാണ് കേടുപാടു സംഭവിച്ചാല് ഇനി ഉപയോഗശൂന്യമാകുക.
നോട്ടു നിരോധനത്തിനു പിന്നാലെ പുറത്തിറക്കിയ 2,000, 500 രൂപ നോട്ടുകളില് പലതും ചെറുതായി കീറുകയോ, മഷിപുരളുകയോ ചെയ്തിട്ടുണ്ട്. ബാങ്കുകളില് നിന്ന് ഇതു മാറി വാങ്ങാനോ, വിനിമയം നടത്താനോ സാധിക്കില്ല. പുതിയ സീരീസ് നോട്ടുകള് മാറി നല്കുന്നതിനുള്ള മാനദണ്ഡങ്ങള് വ്യക്തമാക്കി സര്ക്കുലര് ഇറങ്ങാത്തതാണ് ഇതിനു കാരണം.
200, 50 രൂപയുടെ പുതിയ നോട്ടുകള് അധികം പ്രചാരത്തിലാകാത്തതിനാല് ഇതു വരെ പ്രശ്നങ്ങള് സൃഷ്ടിച്ചിട്ടില്ല. പുതിയ 10 രൂപ നോട്ട് ഇറക്കിയെങ്കിലും അതും പ്രചാരത്തിലായിട്ടില്ല.
ചെറിയ കീറലുകളുള്ള നോട്ടു പോലും ഉപയോഗിക്കാനാകാത്ത സാഹചര്യമാണ് നിലവിലുള്ളത്. നോട്ടുമായി ബാങ്കിലെത്തിയാല് ഒന്നും ചെയ്യാനാകില്ലെന്ന മറുപടിയാണ് ലഭിക്കുന്നത്.
മാത്രമല്ല ബാങ്ക് എടിഎമ്മുകളില് നിന്ന് കേടായ നോട്ടു ലഭിച്ചാലും അതേ ബ്രാഞ്ചില് പോലും മാറി നല്കുന്നില്ലെന്ന പരാതിയുമുണ്ട്. ഇക്കാര്യത്തില് റിസര്വ് ബാങ്കിന്റെ നിര്ദേശം ലഭിച്ചിട്ടില്ലെന്നാണ് ബാങ്കുകളുടെ നിലപാട്.
പഴയ സീരീസ് നോട്ടുകള് മാറി നല്കുമെന്നും പുതിയ സീരീസിലുള്ള നോട്ടുകള് മാറി നല്കുന്നതിനുള്ള സര്ക്കുലര് ലഭ്യമാകാത്തതിനാല് നടപടികള് എടുക്കാനാവില്ലെന്നും റിസര്വ് ബാങ്കും പറയുന്നു.
Leave a Reply