Welcome to NIRBHAYAM.COM | Kerala’s No. 1 News Portal
December 13, 2025 6:14 pm
Published on January 9, 2018 at 9:45 am
പൊലീസ് കുറ്റപത്രം ചോര്ത്തിയെന്ന ദിലീപിന്റെ പരാതിയില് വിധി ഇന്ന്
കൊച്ചി: നടിയെ ആക്രമിച്ച കേസിലെ കുറ്റപത്രം കോടതി പരിശോധിക്കുംമുമ്പ് മാധ്യമങ്ങള്ക്കു ചോര്ത്തി നല്കിയെന്ന നടന് ദിലീപിന്റെ പരാതിയില് അങ്കമാലി മജിസ്ട്രേറ്റ് കോടതി ഇന്നു വിധി പറയും.
അങ്കമാലി മജിസ്ട്രേറ്റ് കോടതിയാണ് വിധി പറയുന്നത്. അന്വേഷണ ഉദ്യോഗസ്ഥരാണ് കുറ്റപത്രം മാധ്യമങ്ങള്ക്ക് ചോര്ത്തി നല്കിയതെന്നും ഇതു ദുരുദ്ദേശപരമാണെന്നും ഉദ്യോഗസ്ഥര്ക്കെതിരെ നടപടി വേണമെന്നുമാണ് ദിലീപിന്റെ ഹര്ജി.
എന്നാല് ദിലീപാണ് കുറ്റപത്രം ചോര്ത്തിയതെന്നാണ് പൊലീസിന്റെ വാദം. ദിലീപ് ഹരിശ്ചന്ദ്രന് അല്ലെന്നും ഫോണ് രേഖകള് മാധ്യമങ്ങള്ക്കു ചോര്ത്തി നല്കിയിട്ടുണ്ടെന്നും പൊലീസ് കോടതിയില് വാദിച്ചിരുന്നു. കുറ്റപത്രം ചോര്ന്ന സംഭവത്തില് കോടതി പൊലീസിനോടു വിശദീകരണം തേടിയിരുന്നു.
ഡിസംബര് 16 ന് വാദം പൂര്ത്തിയായതിനെ തുടര്ന്ന് 23 ന് വിധി പറയാന് തീരുമാനിച്ചിരുന്നെങ്കിലും പിന്നീട് ഇന്നത്തേക്ക് മാറ്റിവെക്കുകയായിരുന്നു. കുറ്റപത്രം ചോര്ന്ന സംഭവത്തില് അന്വേഷണം വേണമെന്നും കുറ്റക്കാര്ക്കെതിരെ നടപടി സ്വീകരിക്കണമെന്നുമാണ് ദിലീപ് ആവശ്യപ്പെട്ടിരിക്കുന്നത്.
കേസില് നിര്ണായകമായേക്കാവുന്ന മൊഴിപ്പകര്പ്പുകളുടെ വിശദാംശങ്ങള് നേരത്തെ പുറത്ത് വന്നിരുന്നു. മഞ്ജു വാര്യര്, കാവ്യ മാധവന്, മുകേഷ്, കുഞ്ചാക്കോ ബോബന്, റിമി ടോമി, സംവിധായകന് ശ്രീകുമാര് മേനോന് തുടങ്ങിയവരുടെ മൊഴിപ്പകര്പ്പുകളാണ് പുറത്തുവന്നത്.
ദീലീപും കാവ്യാമാധവനും തമ്മില് അവിഹിതബന്ധം ഉണ്ടായിരുന്നെന്ന് വ്യക്തമാക്കുന്നതായിരുന്നു മഞ്ജുവിന്റെയും റിമി ടോമിയുടെയും മൊഴികള്.
Leave a Reply