Published on November 12, 2014 at 3:36 pm

വിവാഹം കഴിയാത്ത പെണ്‍മക്കള്‍ ബാധ്യതയെന്ന് കശ്മീരില്‍ കോണ്‍ഗ്രസ് നേതാവ്‌

girls-a-liability-for-parents-congress-leader-states-in-jammu

ശ്രീനഗര്‍: വിവാഹം കഴിയാത്ത പെണ്‍മക്കള്‍ രക്ഷിതാക്കള്‍ക്ക് ബാധ്യതയാണെന്ന് രേഖപ്പെടുത്തി കോണ്‍ഗ്രസ് സ്ഥാനാര്‍ത്ഥിയുടെ ബാധ്യതാ പട്ടികയില്‍. . ജമ്മു കാശ്മീരിലെ കോണ്‍ഗ്രസ് നേതാവ് യൂസഫ് ഭട്ട് ആണ് വിവാദമായ ഈ പ്രസ്താവന നടത്തിയത്.കാശ്മീരിലെ ഗാന്ദെര്‍ബാളിലെ കോണ്‍ഗ്രസ് സ്ഥാനാര്‍ഥിയാണ് യൂസഫ് ഭട്ട്. നിയമസഭ തിരഞ്ഞെടുപ്പിന് സമര്‍പ്പിച്ച സത്യവാങ്മൂലത്തിലാണ് ഇദ്ദേഹം പെണ്‍മക്കള്‍ ബാധ്യതയാണ് എന്ന് പറഞ്ഞത്. ഇതേക്കുറിച്ച് ചോദിച്ചപ്പോള്‍ ഭട്ടിന്റെ പ്രതികരണം രസകരമായിരുന്നു അതേ, വിവാഹം കഴിപ്പിക്കാത്ത പെണ്‍മക്കള്‍ രക്ഷിതാക്കള്‍ക്ക് ബാധ്യത തന്നെയാണ്. എന്റെ പെണ്‍മക്കള്‍ എനിക്ക് ബാധ്യതയാണ്. എന്താണ് നിങ്ങള്‍ ഉദ്ദേശിക്കുന്നത് എന്ന് എടുത്തു ചോദിച്ചപ്പോഴാണ് കോണ്‍ഗ്രസ് നേതാവിന്റെ മനസിലിരിപ്പ് പുറത്തുവന്നത്. പെണ്‍മക്കള്‍ പഠിക്കുകയാണ്. അതിന് ചെലവുണ്ട്. ഇനി അവരെ വിവാഹം കഴിപ്പിച്ചയക്കണം. ഇതൊക്കെക്കൊണ്ടാണ് പെണ്‍മക്കള്‍ ബാധ്യതയാണ് എന്ന് പറഞ്ഞത് യൂസഫ് ഭട്ട് വിശദീകരിച്ചു. സംഭവം വിവാദമായതോടെ യൂസഫ് ഭട്ടിന്റെ സ്ഥാനാര്‍ഥിത്വം കോണ്‍ഗ്രസ് പിന്‍വലിച്ചേക്കുമെന്ന് സൂചനകളുണ്ട്. ഭട്ടിന്റെ പ്രസ്താവനയെ സി പി ഐ നേതാവ് ആനി രാജ ശക്തമായി വിമര്‍ശിച്ചു. ഭട്ട് പറഞ്ഞത് ഭട്ടിന്റെ വ്യക്തിപരമായ അഭിപ്രായമാണ് എന്നും പാര്‍ട്ടിയുടെ നയം ഇതല്ല എന്നുമാണ് എന്നത്തെയും പോലെ ഇക്കാര്യത്തിലും കോണ്‍ഗ്രസ് പാര്‍ട്ടിയുടെ നിലപാട്.

–