Welcome to NIRBHAYAM.COM | Kerala’s No. 1 News Portal
August 25, 2026 10:43 pm
Published on July 18, 2017 at 12:35 pm
കഥ പകുതിയായിട്ടേ ഉള്ളൂവെന്ന് പള്സര് സുനി; ഇനിയും പ്രതികളുണ്ടാകുമെന്ന് ആളൂര്
കൊച്ചി: നടിയെ ആക്രമിച്ച് അപകീര്ത്തിപരമായ ദൃശ്യങ്ങള് പകര്ത്തിയ കേസിലെ ഒന്നാം പ്രതി സുനില്കുമാര് എന്ന പള്സര് സുനിയുടെ റിമാന്ഡ് കാലാവധി നീട്ടി. ഓഗസ്റ്റ് ഒന്നു വരെയാണ് സുനിലിന്റെ റിമാന്ഡ് നീട്ടിയത്.
അങ്കമാലി കോടതിയില് ഹാജരാക്കി തിരികെ കൊണ്ടുപോകുന്നതിനിടെ സുനില് മാധ്യമങ്ങളോട് സംസാരിക്കാന് ശ്രമിച്ചു. ‘കഥ പകുതിയേ ആയിട്ടുള്ളൂ’ എന്നാണ് കേസിനെപ്പറ്റി സുനില് മാധ്യമങ്ങളോട് പറഞ്ഞത്. കേസില് ഇനിയും പ്രതികളുണ്ടാകുമെന്ന് സുനിലിന്റെ അഭിഭാഷകന് ബി.എ. ആളൂരും പ്രതികരിച്ചു.
അതിനിടെ, പള്സര് സുനിയുടെ സഹതടവുകാരന് വിപിന്ലാലിനെ അറസ്റ്റ് ചെയ്യാന് പൊലീസ് തീരുമാനിച്ചു. നടന് ദിലീപിന് ജയിലില്നിന്ന് സുനി അയച്ച കത്ത് എഴുതിയത് വിപിന്ലാല് ആണെന്ന് കണ്ടെത്തിയിരുന്നു. തൊഴില്ത്തട്ടിപ്പുകേസില് പ്രതിയായ വിപിന് ഇപ്പോള് വിയ്യൂര് സെന്ട്രല് ജയിലിലാണ്. സി.ഐയും സംഘവും ജയിലിലെത്തി അറസ്റ്റ് രേഖപ്പെടുത്തും.
അതേസമയം, കൊച്ചിയില് നേരത്തെ നടിയെ തട്ടിക്കൊണ്ടുപോകാന് ശ്രമിച്ച കേസില് പള്സര് സുനിയുടെ സുഹൃത്ത് കോതമംഗലം സ്വദേശി എബിനെ പൊലീസ് കസ്റ്റഡിയിലെടുത്തു. 2011ല് നടന്ന സംഭവത്തില് കൊച്ചി പൊലീസ് കഴിഞ്ഞ ദിവസം കേസെടുത്തതിനു പിന്നാലെയാണ് എബിന് കസ്റ്റഡിയിലായത്.
Leave a Reply