Welcome to NIRBHAYAM.COM | Kerala’s No. 1 News Portal
August 25, 2026 12:45 pm
Published on August 17, 2017 at 11:09 am
നടിക്കെതിരായ പി.സി ജോര്ജിന്റെ പരമാര്ശങ്ങള് മനുഷ്യത്വരഹിതമെന്ന് സ്പീക്കര്
തിരുവനന്തപുരം: കൊച്ചിയില് ആക്രമണത്തിനിരയായ നടിക്കെതിരെ അപകീര്ത്തികരമായ പരാമര്ശങ്ങള് നടത്തുന്ന പി.സി ജോര്ജ് എംഎല്എയ്ക്ക് താക്കീതുമായി സ്പീക്കര് പി. ശ്രീരാമകൃഷ്ണന്.
നിരുത്തരവാദപരമായ പ്രസ്താവനകള് തുടര്ന്നാല് സ്പീക്കര് എന്ന നിലയില് സാധ്യമായ എല്ലാ നടപടികളും സ്വീകരിക്കുമെന്ന് അദ്ദേഹം ജോര്ജിന് മുന്നറിയിപ്പുനല്കി. ഫേസ്ബുക്കിലൂടെയായിരുന്നു അദ്ദേഹത്തിന്റെ പ്രതികരണം.
പി.സി ജോര്ജിന്റെ പരാമര്ശങ്ങള് മനുഷ്യത്വരഹിതമാണെന്നും സ്പീക്കര് അഭിപ്രായപ്പെട്ടു. ഇത്തരം സംഭവങ്ങളില് ഉന്നതസ്ഥാനങ്ങളിലിരിക്കുന്നവര് ന്യായീകരണ വാദവുമായി രംഗത്തുവന്നാല് അതു ക്രിമിനലുകള്ക്കു പ്രോത്സാഹനമാകുമെന്നും അദ്ദേഹം ചൂണ്ടിക്കാട്ടി.
അതേസമയം പി.സി ജോര്ജിന്റെ പരാമര്ശങ്ങള്ക്കെതിരെ സിനിമയിലെ വനിതാ കൂട്ടായ്മ നല്കിയ പരാതി സ്പീക്കറിന്റെ പരിഗണനയിലുണ്ട്. നിരന്തരമായി പരാമര്ശങ്ങള് ഉണ്ടാകുന്ന സാഹചര്യത്തില് പരാതി നിയമസഭയുടെ എത്തിക്സ് കമ്മറ്റിക്ക് വിട്ടേക്കുമെന്നും സൂചനയുണ്ട്.
സ്പീക്കര് പി.ശ്രീരാമകൃഷ്ണന്റെ ഫേസ്ബുക്ക് പോസ്റ്റ്………
പൊലീസ് അന്വേഷിക്കുന്നതും കോടതിയുടെ പരിഗണനയിലിരിക്കുന്നതുമായ ഏതെങ്കിലും കേസിലെ പ്രതികളെ സംബന്ധിച്ചോ അവര്ക്ക് ലഭിക്കേണ്ട ശിക്ഷയെ സംബന്ധിച്ചോ എന്തെങ്കിലും പറയാന് ഞാന് ആളല്ല. നിയമം നിയമത്തിന്റെ വഴിക്കു പോകട്ടെ. അതിനിടയില് കയറി അഭിപ്രായം പറയുന്ന ശീലമെനിക്കില്ല. എന്നാല് അര്ധരാത്രിയില് ജോലി കഴിഞ്ഞുമടങ്ങവേ നിര്മാതാവ് ഏര്പ്പെടുത്തിയ കാറിനുള്ളില് വച്ചു രണ്ടരമണിക്കൂറോളം മാനസികവും ശാരീരികവുമായ പീഡനത്തിനിരയായതായി ഒരു നടി പരാതിപ്പെടുകയും ഞെട്ടലോടെ കേരളം അത് കേള്ക്കുകയും ചെയ്തതാണ്.
‘അങ്ങനെ ആക്രമിക്കപ്പെട്ടവള് രണ്ടാംദിവസം ഷൂട്ടിങ്ങിനുപോകുമോ’ എന്ന മട്ടിലുള്ള പരിഹാസ പ്രയോഗങ്ങള് ഇതേക്കുറിച്ചു നടത്തുന്നത് അങ്ങേയറ്റം മനുഷ്യത്വ വിരുദ്ധമാണെന്നാണ് എന്റെ നിലപാട്. ശരിയാണെന്നു തോന്നുന്നവര്ക്ക് ഐക്യപ്പെടാം. അല്ലാത്തവര്ക്ക് വിയോജിക്കാം. ഇത്തരം സംഭവങ്ങളില് ഉന്നതസ്ഥാനങ്ങളിലിരിക്കുന്നവര് ന്യായീകരണ വാദവുമായി രംഗത്തുവന്നാല് അതു ക്രിമിനലുകള്ക്കു പ്രോല്സാഹനമാകും. ആരുടെ ഭാഗത്തുനിന്നും നിരുത്തരവാദപരമായ ഇത്തരം കമന്റുകള് ഉണ്ടാകാന് പാടില്ല എന്ന അഭിപ്രായത്തില് ഞാന് ഉറച്ചുനില്ക്കുന്നു. ഒരു മനുഷ്യന് എന്നനിലയിലുള്ള എന്റെ ഉറച്ച ബോധ്യമാണിത്. ഈ സംഭവത്തില് ഞാന് വഹിക്കുന്ന സ്ഥാനവുമായി ബന്ധപ്പെട്ട് എന്തു ചെയ്യാന് കഴിയുമെന്നു ചില സുഹൃത്തുക്കള് ചോദിക്കുകയുണ്ടായി. തീര്ച്ചയായും സാധ്യമായതെല്ലാം ചെയ്യും.
Leave a Reply