Welcome to NIRBHAYAM.COM | Kerala’s No. 1 News Portal
December 14, 2025 6:02 am
Published on November 3, 2017 at 12:52 pm
ലോക്നാഥ് ബെഹ്റയ്ക്കും ബി.സന്ധ്യയും ചേര്ന്ന് തന്നെ കുടുക്കി; സി.ബി.ഐ അന്വേഷണം വേണമെന്ന് ദിലീപ്
തിരുവനന്തപുരം: കൊച്ചിയില് നടിയെ ആക്രമിച്ച് അപകീര്ത്തികരമായ ദൃശ്യങ്ങള് പകര്ത്താന് ക്വട്ടേഷന് നല്കിയെന്ന കേസില് പുതിയ നീക്കവുമായി നടന് ദിലീപ്.
തന്നെ കേസില് കുടുക്കുകയായിരുന്നുവെന്നും സത്യം തെളിയിക്കാന് കേസ് അന്വേഷണം സി.ബി.ഐയെ ഏല്പിക്കണമെന്നും ആവശ്യപ്പെട്ട് ദിലീപ് സംസ്ഥാന അഭ്യന്തര സെക്രട്ടറിക്ക് കത്തയച്ചു. രണ്ടാഴ്ച മുന്പാണ് ആഭ്യന്തര സെക്രട്ടറിക്കു ദിലീപ് കത്തുനല്കിയത്.
വ്യാജ തെളിവുകളുണ്ടാക്കി തന്നെ കുടുക്കിയതാണെന്ന് കത്തില് പറയുന്നു. സംസ്ഥാന പൊലീസ് മേധാവി ലോക്നാഥ് ബെഹ്റയും എ.ഡി.ജി.പി ബി. സന്ധ്യയും ചേര്ന്നാണ് തന്നെ കേസില് കുടുക്കിയതെന്ന് ദിലീപ് കത്തില് ആരോപിക്കുന്നു.
ഒക്ടോബര് 18നാണ് 12 പേജുള്ള കത്ത് ആഭ്യന്തര സെക്രട്ടറിക്ക് അയച്ചത്. കത്ത് കിട്ടിയെന്നും പരിശോധിച്ചു വരികയാണെന്നും സര്ക്കാര് അറിയിച്ചു. നടി ആക്രമിക്കപ്പെട്ടതിനുശേഷമുള്ള സംഭവങ്ങള് കത്തില് അക്കമിട്ടു നിരത്തിയിട്ടുണ്ട്.
ഏപ്രില് പത്തിനാണ് പള്സര് സുനിയുടെ ആളുകള് തനിക്കെതിരെ ഭീഷണിയുയര്ത്തി സംവിധായകന് നാദിര്ഷായെ വിളിച്ചത്. അന്നുതന്നെ ഇക്കാര്യം ഡി.ജി.പിയെ വിളിച്ചറിയിച്ചിരുന്നു. ദിവസങ്ങള്ക്കുള്ളില് നേരിട്ടുകണ്ട് പരാതി നല്കുകയും ചെയ്തു.
ഏപ്രില് 18, 20, 21 ദിവസങ്ങളിലുണ്ടായ ബ്ലാക്ക് മെയില് ഫോണ് വിളികളുടെ ശബ്ദരേഖയും ഡി.ജി.പിക്കു കൈമാറി. ഇതുവരെയും ഇവ പരിശോധിക്കാന് പൊലീസ് തയാറായിട്ടില്ലെന്നും കത്തില് പറയുന്നു.
പള്സര് സുനിയെ അറിയില്ലെന്ന നിലപാടില് താന് ഉറച്ചുനില്ക്കുകയാണ്. അതാരും ഇതുവരെ നിഷേധിച്ചിട്ടില്ല. സത്യമിതായിരിക്കെ മറ്റൊരു തരത്തിലാണ് ഡി.ജി.പിയും അന്വേഷണ സംഘവും പെരുമാറിയതെന്നും ദിലീപ് കത്തില് ചൂണ്ടിക്കാട്ടി.
അതുകൊണ്ട് ഈ അന്വേഷണ ഉദ്യോഗസ്ഥരെ മുഴുവന് മാറ്റിനിര്ത്തി വീണ്ടും അന്വേഷണം നടത്തണം. കേസ് സി.ബി.ഐക്കു വിടുകയോ ഇവരെ ഉള്പ്പെടുത്താതെ സത്യസന്ധരായ ഉദ്യോഗസ്ഥരെ ഉള്പ്പെടുത്തി പുതിയ അന്വേഷണ സംഘം കൊണ്ടുവരികയോ വേണം. നിലവില് കേസ് അന്വേഷിക്കുന്ന അന്വേഷണസംഘത്തെ പാടെ മാറ്റി നിര്ത്തി അന്വേഷിച്ചാല് യഥാര്ത്ഥ പ്രതികള് കുടുങ്ങുമെന്നും ദിലീപ് കത്തില് പറയുന്നു.
റൂറല് എസ്.പി എ.വി ജോര്ജ്, ക്രൈബ്രാഞ്ച് എസ്.പി സുദര്ശന്, ഡി.വൈ.എസ്.പി സോജന് വര്ഗ്ഗീസ്, ആലുവ സി.ഐ ബൈജു പൗലോസ് തുടങ്ങിയ ഉദ്യോഗസ്ഥരെ അന്വേഷണത്തില് നിന്നും മാറ്റി നിര്ത്തണമെന്നാണ് ദിലീപ് ആവശ്യപ്പെട്ടിരിക്കുന്നത്.
നടി ആക്രമിക്കപ്പെട്ട കേസില് അന്വേഷണ സംഘം കുറ്റപത്രം പൂര്ത്തിയാക്കി സമര്പ്പിക്കാനിരിക്കെയാണ് ദിലീപിന്റെ നീക്കം.
Leave a Reply