Welcome to NIRBHAYAM.COM | Kerala’s No. 1 News Portal
December 14, 2025 11:39 am
Published on July 5, 2017 at 2:08 pm
സിനിമയില് എല്ലാം ക്ലീനാണ്; നടിമാര് മോശക്കാരാണെങ്കില് കിടക്ക പങ്കിട്ടെന്ന് വരുമെന്ന് ഇന്നസെന്റ്
തൃശൂര്: സിനിമയില് അവസരങ്ങള്ക്കായി കിടക്കപങ്കിടാന് ആവശ്യപ്പെടാറുണ്ടെന്ന ചില നടിമാരുടെ ആരോപണങ്ങള്ക്കെതിരെ അമ്മ പ്രസിഡന്റും എം.പിയുമായ ഇന്നസെന്റ്. ആ കാലം കഴിഞ്ഞെന്നായിരുന്നു മറുപടി. പിന്നെ അവര് മോശമാണെങ്കില് ചിലപ്പോ കിടക്ക പങ്കിട്ടെന്ന് വരുമെന്നും ഇന്നസെന്റ് പറഞ്ഞു.
സിനിമാ മേഖലയില് ചിലരുടെ ഭാഗത്തുനിന്നും മോശമായ പെരുമാറ്റങ്ങള് ഉണ്ടായിട്ടുള്ളതായി യോഗങ്ങളില് പരാതിപ്പെട്ടിട്ടുണ്ടോയെന്ന ചോദ്യത്തോട് പ്രതികരിക്കുകയായിരുന്നു അദ്ദേഹം. അങ്ങനെയുള്ള പരാതികളൊന്നും ലഭിച്ചിട്ടില്ല എന്നായിരുന്നു ഇന്നസെന്റിന്റെ മറുപടി.
താരസംഘടനയായ അമ്മയ്ക്കെതിരെ ഉയര്ന്ന വിമര്ശനങ്ങളുടെ പശ്ചാത്തലത്തില് തൃശൂരിലെ വീട്ടില് വിളിച്ചുചേര്ത്ത വാര്ത്താസമ്മേളനത്തില് മാധ്യമ പ്രവര്ത്തകരുടെ ചോദ്യത്തിന് മറുപടി പറയുകയായിരുന്നു അദ്ദേഹം.
സിനിമയില് അവസരങ്ങള്ക്കായി കിടക്ക പങ്കിടാന് ആവശ്യപ്പെട്ടവരുണ്ടെന്ന ചില നടിമാരുടെ പരാമര്ശം ശ്രദ്ധയില്പ്പെടുത്തിയപ്പോള് ഇന്നസെന്റിന്റെ മറുപടി ഇങ്ങനെ; ‘ആ കാലമൊക്കെ പോയി എന്റെ പൊന്നുപെങ്ങളെ, മനസിലായിട്ടുണ്ടോ, ഒരു സ്ത്രീയോട് വളരെ മോശമായിട്ട് ഒരു കാര്യം ചോദിച്ചാല് ആ നിമിഷം പത്രക്കാരോടും ആള്ക്കാരോടും ആളുകള് പറയും, ആ സ്ത്രീ പറയും അതൊക്കെ. അങ്ങനെയൊരു സംഭവമേ ഇല്ലാ ഇതിനകത്ത്. പിന്നെ അവര് മോശമാണെങ്കില്, ചിലപ്പോ കിടക്ക പങ്കിട്ടെന്ന് വരും. അതല്ലാതെ ഒരാളും ഇല്ലാട്ടോ, ക്ലീന് ക്ലീന് ലൈനിലാണ് കാര്യങ്ങള് പോകുന്നത്. ‘
എന്നാല് ചലച്ചിത്ര മേഖല ലൈംഗിക പീഡന വിമുക്ത മേഖലയാണ് എന്ന മട്ടില് ഇന്നസെന്റ് നടത്തിയ പ്രസ്താവനയോട് വിയോജിക്കുന്നതായി വിമന് ഇന് സിനിമ കലക്റ്റീവ് വ്യക്തമാക്കി. അവസരങ്ങള് ചോദിച്ച് ഈ മേഖലയിലേക്ക് കടന്നു വരുന്ന പുതുമുഖങ്ങളില് പലരും പലതരം ചൂഷണങ്ങള്ക്ക് വിധേയമാകേണ്ടി വരുന്നുണ്ടെന്ന് വിമന് ഇന് സിനിമ കലക്റ്റീവ് ഫേസ്ബുക്ക് കുറിപ്പില് വ്യക്തമാക്കി.
Leave a Reply