Welcome to NIRBHAYAM.COM | Kerala’s No. 1 News Portal
December 14, 2025 11:36 am
Published on January 22, 2018 at 2:58 pm
ദിലീപ് നടിയെ വീണ്ടും അപമാനിക്കാന് ശ്രമിക്കുന്നു; എതിര് സത്യവാങ്മൂലവുമായി പൊലീസ്
കൊച്ചി: നടന് ദിലീപ് ആക്രമണത്തിന് ഇരയായ നടിയെ വീണ്ടും അപമാനിക്കാന് ശ്രമിക്കുന്നുവെന്ന് പൊലീസ്. കേസിലെ പ്രധാന തെളിവായ ദൃശ്യങ്ങളില് നിന്നും ചില സംഭാഷണ ശകലങ്ങള് അടര്ത്തിമാറ്റി നടിയെ വീണ്ടും അപമാനിക്കാനുള്ള ശ്രമമാണ് ദിലീപ് നടത്തുന്നതെന്നാണ് അന്വേഷണ സംഘം പറയുന്നത്.
കേസുമായി ബന്ധപ്പെട്ട ദൃശ്യങ്ങള് ആവശ്യപ്പെട്ട് അങ്കമാലി ഒന്നാം ക്ലാസ് മജിസ്ട്രേട്ട് കോടതിയില് ദിലീപ് ഹര്ജി സമര്പ്പിച്ചിരുന്നു. ഇതിനെതിരെ കേസില് പ്രതിയായ നടന് ദിലീപിന് നടിയുടെ ദൃശ്യങ്ങള് നല്കരുതെന്ന് പോലീസ് ആവശ്യപ്പെടുമെന്നാണ് റിപ്പോര്ട്ട്. കേസ് ഇന്ന് പരിഗണിക്കാനിരിക്കെയാണ് ഇക്കാര്യം കാണിച്ച് എതിര് സത്യവാങ്മൂലം നല്കാനുള്ള പൊലീസിന്റെ നീക്കം.
നടിയെ വീണ്ടും അപമാനിക്കാന് ലക്ഷ്യമിട്ടാണ് ഹര്ജിക്കാരന് ദൃശ്യങ്ങള് ആവശ്യപ്പെടുന്നതെന്നാണ് പൊലീസിന്റെ വാദം. ദൃശ്യങ്ങള് എഡിറ്റ് ചെയ്തതാണെന്ന ഹര്ജിയിലെ ആരോപണത്തെയും പൊലീസ് എതിര്ക്കും.
മുഖ്യപ്രതി പള്സര് സുനി പകര്ത്തിയ നടി ആക്രമിക്കപ്പെടുന്നതിന്റെ ദൃശ്യങ്ങളാണ് ദിലീപ് ആവശ്യപ്പെട്ടിരിക്കുന്നത്. ചട്ടപ്രകാരം ഈ തെളിവുകള് തനിയ്ക്ക് ലഭിക്കേണ്ടതാണെന്ന് ദിലീപ് ഹര്ജിയില് പറയുന്നു. സുനിയുടെ മെമ്മറി കാര്ഡില് നിന്ന് ലഭിച്ച ഈ ദൃശ്യങ്ങള് കേസിലെ സുപ്രധാന തെളിവാണ്.
സാമാന്യബുദ്ധിയ്ക്ക് നിരക്കാത്ത കാര്യങ്ങളാണ് ഹര്ജിയില് ഉന്നയിച്ചിരിക്കുന്നതെന്നും ദൃശ്യത്തിലെ ചില സംഭാഷണങ്ങള് മാത്രമെടുത്ത് തെറ്റിദ്ധാരണ പരത്താനാണ് ദിലീപിന്റെ ശ്രമമെന്നുമാണ് പൊലീസ് ചൂണ്ടിക്കാട്ടുന്നത്.
ദൃശ്യങ്ങളില് നിന്നും ഒരു സ്ത്രീ ശബ്ദം എഡിറ്റ് ചെയ്ത് മാറ്റിയിട്ടുണ്ടെന്നും ഇവര് നല്കുന്ന നിര്ദേശങ്ങള് ഇടയ്ക്ക് കേള്ക്കാനാവുന്നു എന്നുമാണ് ദിലീപ് നല്കിയ ഹര്ജിയില് ഉന്നയിക്കുന്ന പ്രധാന ആരോപണങ്ങള്. നേരത്തേ ദിലീപിന്റെ അഭിഭാഷകന് മജിസ്ട്രേട്ടിന്റെ സാന്നിധ്യത്തില് ദൃശ്യങ്ങള് പരിശോധിച്ചിരുന്നു.
Leave a Reply