രുദ്രാക്ഷം ധരിക്കുന്നതിന്റെ പ്രയോജനങ്ങള്‍

രുദ്രാക്ഷം ധരിക്കുന്നത് ഭാരതീയ സംസ്‌കൃതിയുടെ ഭാഗമാണ്. ദേഹരക്ഷയ്ക്കും ശക്തിക്കും, ബുദ്ധിക്കുമൊക്കെയായാണ് ഇത് ധരിക്കുന്നത്. ജ്യോതിഷ പ്രകാരം ദശാസന്ധി, ബാധ ദോഷം, ദുര്‍മന്ത്രവാദദോഷം എന്നിവ അകറ്റാന്‍ രുദ്രാക്ഷം ധരിക്കുന്നത് ഫലപ്രദമാണെന്നാണ് പറയുന്നത്.

നേപ്പാള്‍, ഇന്തോനേഷ്യ, ഇന്ത്യ, ശ്രീലങ്ക എന്നീ രാജ്യങ്ങളിലെ രുദ്രാക്ഷ മരത്തിന്റെ കായയില്‍ നിന്നുമാണ് രുദ്രാക്ഷം ലഭിക്കുന്നത്. രുദ്രാക്ഷത്തിന്റെ ഉള്ളില്‍ അതിന്റെ വിത്തുകള്‍ അടങ്ങിയിരിക്കുന്നു. വിത്തുകളുടെ എണ്ണം അനുസരിച്ച് രുദ്രാക്ഷത്തിന്റെ മുഖങ്ങള്‍ എത്രയെന്ന് കണക്കാക്കുന്നു.

രുദ്രാക്ഷത്തെ 1999 ലെ ഇന്ത്യന്‍ ജിമോളജിക്കല്‍ കോണ്‍ഫറന്‍സ് ജൈവരത്‌നമായി അംഗീകരിച്ചിട്ടുണ്ട്. ഓര്‍ഗാനിക് ജെം ആണ് രുദ്രാക്ഷം, രുദ്രാക്ഷ രത്‌നം എന്നും വിളിക്കാം.

ശ്രീമഹാദേവന്‍ ത്രിപുരാസുരനെ സംഹരിക്കാനും ദേവന്മാരെ രക്ഷിക്കാനും വിഘ്നങ്ങളെ ഇല്ലാതാക്കാനുമായിട്ട് അഘോരശസ്ത്രത്തെ സ്മരിച്ചപ്പോള്‍ ഭഗവാന്റെ നേത്രങ്ങളില്‍ നിന്ന് കണ്ണീര്‍ ഇറ്റിറ്റു വീണു. അവിടെ വീണ അശ്രുബിന്ദുക്കളില്‍നിന്ന് രുദ്രാക്ഷ മഹാവൃക്ഷങ്ങള്‍ ഉണ്ടായെന്നാണ് വിശ്വാസം.

രുദ്രാക്ഷങ്ങള്‍ മാലയായിട്ടും ഒറ്റയ്ക്കും മൂന്നായിട്ടും കഴുത്തില്‍ ധരിക്കാം. ബ്രേയ്‌സ്‌ലെറ്റ് ആയും ധരിക്കാം. സ്വര്‍ണം, വെളളി, ചരട് എന്നിവയില്‍ ധരിക്കാം. എല്ലാ ജാതിമതക്കാര്‍ക്കും രുദ്രാക്ഷം ധരിക്കാവുന്നതാണ്. ഒരു നെല്ലിക്കാ വലുപ്പമുളളതാണ് ഉത്തമം. നെല്ലിക്കാ കുരുവിന്റെ വലിപ്പം ഉളളതു മധ്യമം. തീരെ ചെറുത് അധമം.

108 രുദ്രാക്ഷവും ചുട്ടിയായി കുറച്ച് വലിയ രുദ്രാക്ഷവും ചേര്‍ത്തു മാലയായി ധരിക്കാം. വെളളി, സ്വര്‍ണം തുടങ്ങിയ ലോഹങ്ങളില്‍ രുദ്രാക്ഷം ധരിക്കുന്നതാണ് ഉത്തമം. ശരീരത്തിലെ ജൈവ വൈദ്യുതിയുടെ നിയന്ത്രണത്തിനും പോഷണത്തിനും രുദ്രാക്ഷം സഹായിക്കും എന്ന അഭിപ്രായവും ഉണ്ട്. ധരിക്കാന്‍ താല്‍പര്യമില്ലാത്തവര്‍ക്ക് പൂജാവസ്തുവായി ഉപയോഗിക്കാം. സര്‍വപാപദോഷമുക്തിയാണു രുദ്രാക്ഷധാരണം കൊണ്ട് ഉദ്ദേശിക്കുന്നത്.

108 രുദ്രാക്ഷം കോര്‍ത്ത മാല ധരിക്കുകയാണെങ്കില്‍ ഓരോ നിമിഷവും അശ്വമേധം നടത്തുന്ന ഫലം ലഭിക്കുമെന്നാണ് പറയപ്പെടുന്നത്.

ഒറ്റ മുഖമുള്ള രുദ്രാക്ഷം സാക്ഷാല്‍ ശിവനാണ്. അത് ബ്രഹ്മഹത്യാപാപത്തെ നശിപ്പിക്കും. രണ്ടുമുഖമുള്ളത് ദേവീദേവന്മാരാണ്. അത് വിവിധ തരത്തിലുള്ള പാപങ്ങളെയും നശിപ്പിക്കും. മൂന്നു മുഖമുള്ളത് അഗ്നിയാണ്. അത് സ്ത്രീഹത്യാപാപത്തെ തല്‍ക്ഷണം നശിപ്പിക്കും. നാലു മുഖമുള്ളത് ബ്രഹ്മാവാകുന്നു. അത് നരഹത്യപാപത്തെ ഇല്ലാതാക്കുന്നു.

അഞ്ചു മുഖമുള്ളത് കാലാഗ്നിതുല്യനായ രുദ്രനാണ്. അഭക്ഷ്യഭക്ഷണം കൊണ്ടും അഗമ്യഗമനംകൊണ്ടും ഉണ്ടാകുന്ന പാപം സകലതും അഞ്ചുമുഖമുള്ള രുദ്രാക്ഷം ധരിക്കുന്നതുകൊണ്ട് നശിക്കുന്നു. ആറുമുഖമുള്ളത് കാര്‍ത്തികേയനാകുന്നു. അതു വലത്തെ കൈയിലാണ് ധരിക്കേണ്ടത് അതു ധരിച്ചാല്‍ ബ്രഹ്മഹത്യാദി പാപങ്ങളില്‍നിന്നും മുക്തനാകും.

ഏഴു മുഖമുള്ള രുദ്രാക്ഷം മഹാഭാഗനായ കാമദേവന്‍ എന്നു പേരുള്ളതാണ്. അതു ധരിച്ചാല്‍ സ്വര്‍ണ്ണം മോഷ്ടിക്കുക തുടങ്ങിയ പാപങ്ങളില്‍ നിന്നും മുക്തനാകാം. എട്ടു മുഖമുള്ളത് സാക്ഷാല്‍ വിനായകനാണ്. അന്നം, വസ്ത്രം, സ്വര്‍ണ്ണം ഇത്യാദി മോഷ്ടിക്കുക, ദുഷ്ടകുലത്തില്‍പ്പെട്ട സ്ത്രീയെയോ, ഗുരുപത്നിയെയോ സ്പര്‍ശിക്കുക തുടങ്ങിയ പാപങ്ങള്‍ അതു ധരിച്ചാല്‍ ഇല്ലാതാകും.

ഒന്‍പതു മുഖമുള്ളത് ഭൈരവനാണ്. അത് ഇടം കൈയില്‍ വേണം ധരിക്കാന്‍. ഭ്രൂണഹത്യാപാപങ്ങളും നൂറു ബ്രഹ്മഹത്യാപാപങ്ങളും ഒന്‍പതു മുഖമുള്ളത് ധരിച്ചാല്‍ ഉടന്‍ നശിക്കും. പത്തു മുഖമുള്ളത് ദേവേശനായ സാക്ഷാല്‍ ജനാര്‍ദ്ദനമൂര്‍ത്തിയാണ്. ദുഷ്ടഗ്രഹങ്ങളും പിശാചുക്കളും വേതാളങ്ങളും ബ്രഹ്മരക്ഷസ്സുകളും സര്‍പ്പങ്ങളും മൂലമുണ്ടാകുന്ന പീഡകള്‍ പത്തുമുഖമുള്ള രുദ്രാക്ഷം ധരിക്കുന്നതുകൊണ്ട് ഇല്ലാതാകും.

പതിനൊന്ന് മുഖമുള്ള രുദ്രാക്ഷം ഏകാദശ രുദ്രന്മാരാണെന്ന് പറയപ്പെടുന്നു. ആയിരം അശ്വമേധവും നൂറു വാജപേയവും യഥാവിധി പതിനായിരം ഗോദാനവും ചെയ്താല്‍ എത്ര പുണ്യം ലഭിക്കുമോ, അത്രത്തോളം പുണ്യം പതിനൊന്ന് മുഖമുള്ള രുദ്രാക്ഷം ധരിച്ചാല്‍ ലഭിക്കും. പന്ത്രണ്ട് മുഖമുള്ള രുദ്രാക്ഷം കാതില്‍ ധരിച്ചാല്‍ പന്ത്രണ്ടു മുഖങ്ങളിലായി സ്ഥിതി ചെയ്യുന്ന പന്ത്രണ്ട് ആദിത്യന്മാരും നിത്യവും സന്തുഷ്ടരാകുമെന്നാണ് വിശ്വാസം.

പതിമൂന്ന് മുഖമുള്ള രുദ്രാക്ഷം കാര്‍ത്തികേയന് തുല്യമാണ്. സര്‍വ്വകാമാര്‍ത്ഥങ്ങളെയും അത് പ്രദാനം ചെയ്യും. പതിന്നാലു മുഖമുള്ള രുദ്രാക്ഷം ശിരസ്സില്‍ ധരിക്കുന്നവന്‍ ശിവതുല്യനായിത്തീരുന്നു.

ഉത്തമബ്രാഹ്മണര്‍ ശിരസ്സില്‍ ഭക്തിപൂര്‍വ്വം ഒരു രുദ്രാക്ഷം അവശ്യം ധരിക്കേണ്ടതാണെന്ന് വേദം പറയുന്നു. ഇരുപത്തിയാറ് രുദ്രാക്ഷംകൊണ്ടുള്ള മാല മുടിയില്‍ ചൂടണം. അമ്പതെണ്ണമുള്ള മാല മാറിലും പതിനാറെണ്ണമുള്ളത് തോളിലും പന്ത്രണ്ടണ്ണമുള്ളത് വളപോലെ മണിബന്ധത്തിലും ധരിക്കണം.