Welcome to NIRBHAYAM.COM | Kerala’s No. 1 News Portal
August 25, 2026 8:35 pm
Published on October 3, 2017 at 2:00 pm
ഒടുവില് ദിലീപിന് കടുത്ത ഉപാധികളോടെ ജാമ്യം
കൊച്ചി: നടിയെ ആക്രമിച്ച കേസിലെ ഗൂഢാലോചനയുമായി ബന്ധപ്പെട്ടു ജയിലില് കഴിയുന്ന നടന് ദിലീപിന് ഹൈക്കോടതി കടുത്ത ഉപാധികളോടെ ജാമ്യം അനുവദിച്ചു.
സോപാധിക ജാമ്യം അനുവദിക്കണമെന്ന് ആവശ്യപ്പെട്ട് 35 പേജുള്ള ജാമ്യഹര്ജിയാണ് ദിലീപ് സമര്പ്പിച്ചത്. ജാമ്യത്തിനായി മൂന്നാം തവണയാണു ദിലീപ് ഹൈക്കോടതിയെ സമീപിച്ചത്. ജസ്റ്റിസ് സുനില് തോമസിന്റെ ബെഞ്ചാണ് ഹര്ജി പരിഗണിച്ചത്. അങ്കമാലി മജിസ്ട്രേട്ട് കോടതി ജാമ്യാപേക്ഷ തള്ളിയതിനു തൊട്ടുപിന്നാലെയാണ് ദിലീപ് മൂന്നാം തവണ ജാമ്യം തേടി ഹൈക്കോടതിയില് എത്തിയത്.
കഴിഞ്ഞ ജൂലൈ പത്തിനാണ് നടി ആക്രമിക്കപ്പെട്ട കേസില് ദിലീപിനെ പൊലീസ് അറസ്റ്റ് ചെയ്യുന്നത്. നിയമപ്രകാരം 90 ദിവസം തടവില് കഴിഞ്ഞാല് അദ്ദേഹത്തിന് സ്വാഭാവികജാമ്യത്തിന് അര്ഹതയുണ്ട്. കേസില് ഈയാഴ്ചതന്നെ കുറ്റപത്രം സമര്പ്പിക്കാനാണ് അന്വേഷണ ഉദ്യോഗസ്ഥരുടെ നീക്കം. ദിലീപ് ജയിലിലായിട്ട് ഈ മാസം എട്ടിന് 90 ദിവസം പൂര്ത്തിയാകും.
നടിയെ ആക്രമിച്ചകേസില് കുറ്റകൃത്യത്തില് നേരിട്ട് പങ്കെടുത്തവരെല്ലാം ഇതിനോടകം പൊലീസ് കസ്റ്റഡിയിലായിട്ടുണ്ട്. കൃത്യത്തിന്റെ ഗൂഢാലോചനയും ആസൂത്രണവും സംബന്ധിച്ച കാര്യങ്ങളാണ് പൊലീസ് ഇപ്പോള് അന്വേഷിക്കുന്നത്. ഈ ആക്രമണം ആസൂത്രണം ചെയ്തയാളാണ് ദിലീപ് എന്ന് പറയുന്ന പൊലീസ് ഇതില് മറ്റുള്ളവര്ക്കുള്ള പങ്കാണ് ഇപ്പോള് പരിശോധിക്കുന്നത്.
Leave a Reply