Welcome to NIRBHAYAM.COM | Kerala’s No. 1 News Portal
August 10, 2026 6:40 am
Published on September 18, 2017 at 11:59 am
കാവ്യയുടെയും നാദിര്ഷായുടെയും പങ്ക് അന്വേഷിക്കുകയാണെന്ന് പൊലീസ്; പ്രതിയാക്കേണ്ട സാഹചര്യം ഇപ്പോഴില്ല
കൊച്ചി: നടിയെ ആക്രമിച്ച കേസില് റിമാന്ഡില് കഴിയുന്ന ദിലീപിന്റെ ഭാര്യ കാവ്യാ മാധവന്റേയും, സുഹൃത്ത് നാദിര്ഷയുടേയും പങ്ക് അന്വേഷിച്ചു കൊണ്ടിരിക്കുകയാണെന്ന് പൊലീസ്.
കാവ്യ സമര്പ്പിച്ച മുന്കൂര് ജാമ്യഹര്ജിയ്ക്ക് മറുപടിയായി നല്കുന്ന റിപ്പോര്ട്ടിലാണ് കാവ്യയുടേയും നാദിര്ഷയുടേയും പങ്ക് അന്വേഷിക്കുന്നുണ്ടെന്ന കാര്യം ഇതാദ്യമായി പൊലീസ് സ്ഥിരീകരിച്ചത്. കാവ്യയുടെ മുന്കൂര് ജാമ്യാപേക്ഷ ഹൈക്കോടതി ഇന്നു പരിഗണിക്കാനിരിക്കുകയാണ്. നടി ആക്രമിക്കപ്പെട്ട കേസില് അന്വേഷണം ഇപ്പോഴും തുടരുകയാണെന്നും പലരേയും ഇപ്പോഴും ചോദ്യം ചെയ്തുകൊണ്ടിരിക്കുകയാണെന്നും പൊലീസ് തയ്യാറാക്കിയ റിപ്പോര്ട്ടില് പറയുന്നു.
ശനിയാഴ്ചയാണു മുന്കൂര് ജാമ്യം തേടി കാവ്യാ മാധവന് ഹൈക്കോടതിയെ സമീപിച്ചത്. ഇതിന്മേല് ഇന്നു വാദം നടക്കും. ദിലീപിനു വേണ്ടി ഹാജരാകുന്ന അഭിഭാഷകന് രാമന്പിള്ള തന്നെ കാവ്യയ്ക്കായും ഹാജരാകും.
അതേസമയം, കേസില് കാവ്യാ മാധവനെയും നാദിര്ഷായെയും ഇപ്പോള് പ്രതിയാക്കേണ്ട സാഹചര്യമില്ലെന്നു പൊലീസ് അറിയിച്ചു. ഇരുവര്ക്കുമെതിരെ അന്വേഷണം നടക്കുകയാണെന്നും പൊലീസ് വ്യക്തമാക്കി.
കേസ് അന്വേഷണം അന്തിമഘട്ടത്തില് എത്തിയ സാഹചര്യത്തില് അറസ്റ്റ് സാധ്യത മുന്നില്കണ്ടാണ് കാവ്യാ മാധവന് ഹൈക്കോടതിയില് മുന്കൂര് ജാമ്യാപേക്ഷ നല്കിയത്. അടിയന്തര പ്രധാന്യത്തോടെ ശനിയാഴ്ച തന്നെ പരിഗണിക്കണമെന്ന് അഭ്യര്ഥിച്ചായിരുന്നു കാവ്യയുടെ ജാമ്യാപേക്ഷ.
നടിയെ ആക്രമിച്ച കേസില് അറസ്റ്റ് ചെയ്യുമെന്ന് അന്വേഷണ ഉദ്യോഗസ്ഥരില്നിന്ന് ഭീഷണിയുണ്ടെന്നും അന്വേഷണ ഉദ്യോഗസ്ഥര് നിയമവിരുദ്ധമായ കാര്യങ്ങള് അംഗീകരിക്കാന് സമ്മര്ദം ചെലുത്തുന്നുണ്ടെന്നും കാവ്യ ജാമ്യാപേക്ഷയില് ആരോപിക്കുന്നു.
കേസിലെ മുഖ്യപ്രതി പള്സര് സുനിയുടെ മൊഴി പ്രകാരം മാഡം എന്നൊരു കഥാപാത്രത്തെ കൃത്രിമമായി ഉണ്ടാക്കാന് ശ്രമമുണ്ട്. അത് താനാണെന്ന് വരുത്തിത്തീര്ക്കാനാണ് നീക്കം. ആസൂത്രിതമായാണ് പള്സര് സുനി ഒരോ വെളിപ്പെടുത്തലും നടത്തുന്നത്. സുനിയെ നുണപരിശോധനയ്ക്കു വിധേയനാക്കാന് അപേക്ഷ നല്കിയെങ്കിലും സുനി അതിനു വിസമ്മതിച്ചു. അയാള് പറയുന്നത് കളവാണെന്ന് അതില് നിന്നുതന്നെ വ്യക്തമാണ്.
ദിലീപിന്റെ ഭാര്യയാണെന്ന കാരണം കൊണ്ടാണ് തന്നെ വേട്ടയാടുന്നത്. ഉദ്യോഗസ്ഥര് തന്റെ സ്ഥാപനമായ ലക്ഷ്യയിലെത്തി മാതാപിതാക്കളെയും സഹോദരനെയും ഭീഷണിപ്പെടുത്തുന്ന സാഹചര്യം വരെയുണ്ടായെന്നും കാവ്യ ജാമ്യാപേക്ഷയില് പറയുന്നു.
Leave a Reply