Welcome to NIRBHAYAM.COM | Kerala’s No. 1 News Portal
June 24, 2026 7:26 am
Published on September 11, 2017 at 11:44 am
നടിമാരിലും ദിലീപിനെ ജയിലില് പോയി കാണാന് ആഗ്രഹമുള്ളവരുണ്ടാകും; പോകാത്തത് ഭയംകൊണ്ടെന്ന് ഭാഗ്യലക്ഷ്മി
തിരുവനന്തപുരം: കൊച്ചിയില് നടി ആക്രമിക്കപ്പെട്ട കേസില് ജയിലില് കഴിയുന്ന നടന് ദിലീപിനെ സിനിമാക്കാര് സന്ദര്ശിക്കുന്നതിനെ രൂക്ഷമായി വിമര്ശിച്ച് ഡബ്ബിങ് ആര്ട്ടിസ്റ്റ് ഭാഗ്യലക്ഷ്മി.
ആര്ക്കോ വേണ്ടി ദിലീപിനെ സംഘടനയില് നിന്ന് പുറത്താക്കുന്നതുപോലെ കാണിച്ച് പിന്നില് നിന്ന് പിന്തുണയ്ക്കുകയാണ് ഇവരെല്ലാമെന്നും കണ്ണും കാതുമൊന്നുമില്ലാത്ത സമൂഹത്തോട് പ്രതികരിച്ചിട്ട് എന്താണ് കാര്യമെന്നും ഭാഗ്യലക്ഷ്മി ചോദിച്ചു.
എല്ലാവരും ഉക്കം നടിക്കുകയാണ്. ഇവരൊന്നും ദിലീപിനെ വ്യക്തിപരമായി കാണാന് പോയതാണെന്നു പോലും പറയുന്നില്ലല്ലോ. അമ്മ സംഘടനയുടെ വൈസ് പ്രസിഡന്റ് ഗണേഷ്കുമാറും ദിലീപിനെ കാണാന് പോയി. ഒരു ജനപ്രതിനിധി തന്റെ സുഹൃത്തിന് വേണ്ടി ഒരു പെണ്കുട്ടിയെ മോശമായി ചിത്രീകരിക്കുമ്പോള് പ്രതികരിക്കേണ്ടത് സമൂഹമാണെന്നും ഭാഗ്യലക്ഷ്മി പറഞ്ഞു.
ഇദ്ദേഹത്തെയൊക്കെ വോട്ട് ചെയ്ത് വിജയിപ്പിച്ചത് ജനങ്ങളല്ലേ. ഇങ്ങനെയൊരാള് എങ്ങനെയാണ് ജനങ്ങള്ക്കിടയില് പ്രവര്ത്തിക്കുന്നത്. ജനപ്രതിനിധി വ്യക്തിക്ക് വേണ്ടിയല്ല സംസാരിക്കേണ്ടതെന്നും വിഷയത്തിന് വേണ്ടിയാണെന്നും ഭാഗ്യലക്ഷ്മി പറഞ്ഞു. മനോരമയ്ക്ക് അനുവദിച്ച പ്രത്യേക അഭിമുഖത്തിലായിരുന്നു ഭാഗ്യലക്ഷ്മിയുടെ പ്രതികരണം.
തനിക്ക് ഒരാശ്വാസമുണ്ട്, നടിമാരൊന്നും ജയിലില് പോയി ദിലീപിനെ കണ്ടില്ലല്ലോ എന്ന്. അവരിലും പോകണമെന്ന് ആഗ്രഹമുള്ളവരുണ്ടാകും. എന്നാല് ജയിലിനെ പേടിച്ചായിരിക്കും അവര് പോകാതിരുന്നതെന്ന് ഭാഗ്യലക്ഷ്മി പറഞ്ഞു. അതുകൊണ്ടാണല്ലോ അമ്മയുടെ യോഗത്തില് ഇവര് മിണ്ടാതിരുന്നതെന്നും അവര് ചോദിച്ചു.
ദിലീപിനെ കാണാന് പോയവരൊന്നും ആ പെണ്കുട്ടിയെ കാണാന് പോകാതിരുന്നത് എന്തുകൊണ്ടാണ്. അവളുടെ അടുത്ത് ഓണക്കോടിയുമായി പോയി നിന്നോടൊപ്പം ഞങ്ങളുണ്ട് എന്ന് പറഞ്ഞുകൂടെയെന്നും ഭാഗ്യലക്ഷ്മി ചോദിക്കുന്നു.
എന്നെക്കാണാന് ആരും വന്നില്ലെന്നും എന്റെ ജീവിതത്തിലെ ഏറ്റവും ദു:ഖകരമായ ഓണമായിരുന്നു ഈ കഴിഞ്ഞുപോയതെന്നും അവള് പറഞ്ഞത് ആരും കേട്ടില്ലേ? സഹതാപ തരംഗം സൃഷ്ടിച്ച് ഇവര് ദിലീപിനെ പിന്തുണയ്ക്കുമ്പോള് അതെല്ലാം ദിലീപിനെതിരായി വരുമെന്ന് അവര് അറിയുന്നില്ല. അയാള് അഗ്നിശുദ്ധി വരുത്തി തിരിച്ചുവരുമെന്ന് ആരും പറയാത്തതെന്താണെന്നും ഭാഗ്യലക്ഷ്മി ചോദിക്കുന്നു.
ഞങ്ങള് ന്യൂനപക്ഷമായ സ്ത്രീ സമൂഹം അവളോടൊപ്പമുണ്ട്. അതിന് ഒരു ഓണക്കോടിയുടേയും ആവശ്യമില്ല. ഞങ്ങള് അവളോടൊപ്പമുണ്ടെന്നും അവള്ക്കുമറിയാം, ഞങ്ങള്ക്കുമറിയാം. അതിന് ബോധിപ്പിക്കേണ്ട കാര്യമില്ലെന്നും അവള്ക്ക് നീതി ലഭിക്കുമെന്ന് ഉറപ്പുണ്ടെന്നും ഭാഗ്യലക്ഷ്മി പറഞ്ഞു.
Leave a Reply