Published on October 22, 2016 at 12:58 pm

‘പുലിമുരുകന്‍’ കുതിക്കുന്നു….രണ്ടാഴ്ചയിലെ ബോക്സ് ഓഫീസ് കളക്ഷൻ കേട്ടാൽ ഞെട്ടും!

pulimurugan-movie-second-week-collection

മലയാള സിനിമയിലെ കളക്ഷൻ റെക്കോർഡുകൾ തർത്ത് പുലിമുരുകൻ മുന്നേറുന്നു; പുറത്തിറങ്ങി രണ്ടാഴ്ച പിന്നിടുമ്ബോള്‍ ചിത്രം വാരിക്കൂട്ടിയത് അറുപതുകോടി രൂപ. ഇന്ത്യയൊട്ടാകെ ഉള്ള കളക്ഷന്‍ തുകയാണിത്. ആദ്യദിവസം 4.06 കോടി, രണ്ടാം ദിനം 4.03 കോടി, മൂന്നാം ദിനം 4.83 കോടി എന്നിങ്ങനെ. അതായത് മൂന്ന് ദിവസം കൊണ്ട് മാത്രം 12.91 കോടി രൂപ. ആദ്യ മൂന്ന് ദിവസത്തെ കളക്ഷനിലൂടെ മാത്രം അതിവേഗം 10 കോടി പിന്നിടുന്ന മലയാളചിത്രം എന്ന റെക്കോര്‍ഡ് സ്വന്തമാക്കിയിരുന്നു ‘പുലിമുരുകന്‍’. പിന്നീടുള്ള ദിവസങ്ങളിലും മൗത്ത്പബ്ലിസിറ്റി വഴി തീയേറ്ററുകളിലെ തിരക്ക് നിലനിര്‍ത്താനായി ‘മുരുകന്’.

ഏറ്റവും വേഗത്തില്‍ 25 കോടി പിന്നിടുന്ന മലയാളചിത്രം എന്ന റെക്കോര്‍ഡായിരുന്നു അടുത്തത്. ഒരാഴ്ചകൊണ്ടാണ് ചിത്രം 25 കോടി പിന്നിട്ടത്. കേരളത്തിനകത്തും പുറത്തുമുള്ള 325 റിലീസ് കേന്ദ്രങ്ങളില്‍ നിന്നായി ഏഴ് ദിവസം കൊണ്ട് 25.43 കോടിയാണ് നേടിയത്.

പുലിമുരുകന്‍ റിലീസായി രണ്ടാഴ്ച പിന്നിടുമ്പോഴുള്ള തീയേറ്റര്‍ കളക്ഷനാണ് ചുവടെ. ഒക്ടോബര്‍ 7 വെള്ളിയാഴ്ചയാണ് 325 തീയേറ്ററുകളില്‍ മോഹന്‍ലാല്‍ ചിത്രം പ്രദര്‍ശനത്തിനെത്തിയത്. മലയാളസിനിമയിലെ എക്കാലത്തെയും കളക്ഷന്‍ റെക്കാേര്‍ഡിനുടമയായ ‘ദൃശ്യ’ത്തിന് അരികില്‍ എത്തിയിരിക്കുകയാണ് പുലിമുരുകന്‍. ദൃശ്യത്തിന്റെ ആജീവനാന്ത തീയേറ്റര്‍ കളക്ഷന്‍ 68.15 കോടി ആണ്. എന്നാല്‍ ഒക്ടോബര്‍ 7 മുതല്‍ 20 വരെയുള്ള 14 ദിവസം കൊണ്ട് മാത്രം പുലിമുരുകന്‍ നേടിയത് 60 കോടിക്ക് മുകളിലും! അനൗദ്യോഗിക കണക്കാണിത്.

രണ്ടാഴ്ച പിന്നിടുമ്പോഴും പ്രധാന കേന്ദ്രങ്ങളിലെല്ലാം മിക്ക ഷോകളും ഹൗസ്ഫുള്‍ ആണ്. വമ്പന്‍ മൗത്ത് പബ്ലിസിറ്റി ലഭിച്ചതോടെ യുവാക്കള്‍ക്കൊപ്പം കുടുംബങ്ങളും ആദ്യആഴ്ച തന്നെ പുലിമുരുകന്‍ കാണാനെത്തി. കുടുംബവുമൊത്ത് മള്‍ട്ടിപ്ലെക്‌സുകളില്‍ സിനിമ കാണണമെങ്കില്‍ ദിവസങ്ങള്‍ക്ക് മുന്‍പ് ടിക്കറ്റ് ബുക്ക് ചെയ്യേണ്ട അവസ്ഥയുണ്ടായിരുന്നു.

ചിത്രത്തിന്റെ യുഎസ്, യൂറോപ്പ് റിലീസ് അടുത്തയാഴ്ചയാണ്. നവംബര്‍ 3ന് ഗള്‍ഫിലുമെത്തും ചിത്രം. യൂറോപ്പില്‍ ഒരു മലയാളചിത്രത്തിന് ലഭിക്കുന്ന ഏറ്റവുമധികം സ്‌ക്രീനുകളും പുലിമുരുകന്‍ സ്വന്തമാക്കി. യൂറോപ്പില്‍ മാത്രം 150 സ്‌ക്രീനുകളിലാണ് ചിത്രം പ്രദര്‍ശനത്തിനെത്തുക. ഈ സ്‌ക്രീനുകളിലെയെല്ലാം ആദ്യ പ്രദര്‍ശനങ്ങളുടെ ബുക്കിംഗ് ഇതിനകം തന്നെ പൂര്‍ത്തിയായിട്ടുണ്ട്. വിദേശ റിലീസുകള്‍ കൂടി പരിഗണിക്കുമ്പോള്‍ ആദ്യമായി 100 കോടി കളക്ഷന്‍ നേടുന്ന മലയാളചിത്രമാവാനുള്ള വലിയ സാധ്യതയാണ് പുലിമുരുകന് മുന്നിലുള്ളത്. തമിഴ്, തെലുങ്ക് മൊഴിമാറ്റ പതിപ്പുകളും വൈകാതെ തീയേറ്ററുകളിലെത്തും.