Published on October 27, 2016 at 11:10 am

ജിയോ ഉപഭോക്താക്കള്‍ക്ക് ഒരു സന്തോഷ വാര്‍ത്ത….സൗജന്യ സേവനങ്ങൾ അടുത്തവർഷം മാർച്ച് വരെ….!!

ന്യൂഡല്‍ഹി: റിലയന്‍സ് ജിയോയുടെ സൗജന്യ സേവനങ്ങള്‍ വരുന്ന മാര്‍ച്ച് വരെ നീട്ടുന്നതായി റിപ്പോര്‍ട്ട്. വെല്‍ക്കം ഓഫറായി അവതരിപ്പിച്ച സൗജന്യ ആനുകൂല്യങ്ങള്‍ ആദ്യം ഡിസംബര്‍ 31 വരെ നല്‍കുമെന്നായിരുന്നു കമ്ബനി അറിയിച്ചിരുന്നത്.10 കോടി ജിയോ ഉപയോക്താക്കള്‍ എന്ന ലക്ഷ്യത്തിലേക്കെത്താനായാണ് ജിയോ സൗജന്യം തുടരുന്നത്.ഇപ്പോള്‍ വോയ്സ് കോളുകളും 4 ജി ഡാറ്റയും സിം എടുത്ത എല്ലാവര്‍ക്കും സൗജന്യമാണ്. തുടര്‍ന്ന് ഒരു ജിബി ഡാറ്റയ്ക്ക് 130140 രൂപ വരെയായിരിക്കും ഈടാക്കുക. ജിയോ കോള്‍ ഡ്രോപ്പുകളും ട്രാഫികും പരിഹരിക്കാത്തതുകൊണ്ട് മികച്ച നിലവാരത്തിലുള്ള സേവനം ഉറപ്പാക്കുംവരെ ജിയോ സേവനങ്ങള്‍ സൗജന്യമായി തുടരുമെന്ന് ജിയോ പ്ലാനിംഗ് ഹെഡ് ആയ അന്‍ഷുമാര്‍ താക്കുര്‍ അറിയിച്ചു.

എന്നാല്‍, ട്രായ് നിയമപ്രകാരം ഒരു ടെലികോം കമ്പനിയ്ക്ക് മൂന്ന് മാസത്തില്‍ കൂടുതല്‍ സൗജന്യ സേവനം അനുവദിക്കാനാകില്ല. എന്നാല്‍, ലോഞ്ചിങ് നടത്തി കമ്പനിയുടെ ചെലവില്‍ സൗജന്യ ഓഫറുകള്‍ നല്‍കാവുന്നതാണ്.കഴിഞ്ഞ ദിവസം ജിയോയില്‍ നിന്നുള്ള കോളുകള്‍ സ്വന്തം നെറ്റ് വര്‍ക്കിലേക്ക് കണക്‌ട് ചെയ്ത് നല്‍കാതിരുന്നതിന് എയര്‍ടെല്‍, ഐഡിയ, വോഡഫോണ്‍ എന്നീ മൂന്ന് കമ്ബനികളില്‍ നിന്ന് 3050 കോടി രൂപ പിഴ ചുമത്താന്‍ ട്രായ് നിര്‍ദേശിച്ചിരുന്നു.ജിയോ തരംഗമായി മാറിയതോടെ കൂടുതല്‍ ആളുകള്‍ ജിയോ കണക്ഷന്‍ എടുത്തിരുന്നു. അണ്‍ലിമിറ്റഡ് നെറ്റ് പാക്കായിരുന്നു ജിയോയെ വിപണിയിലെ താരമാക്കിയത്. ഈ രംഗത്തെ മത്സരത്തില്‍ നിന്നും ജിയോയെ പുറത്താക്കാനായാണ് കമ്ബനികള്‍ കണക്ടിവിറ്റി അനുവദിക്കാതിരുന്നതെന്നാണ് ആരോപണം.

ജിയോയുടെ സൗജന്യ വെല്‍ക്കം ഓഫറിന്റെ വലിഡിറ്റി ഡിസംബര്‍ മൂന്ന് വരെ മാത്രമായിരിക്കുമെന്ന് നേരത്തെ ട്രായ് പറഞ്ഞിരുന്നു. 90 ദിവസത്തേക്ക് മാത്രമാണ് നിയമപ്രകാരം സൗജന്യ സേവനം അനുവദിക്കാനാവുക. അതനുസരിച്ച് ഡിസംബര്‍ മൂന്നിന് സമയ പരിധി പൂര്‍ത്തിയാകുമെന്നും ട്രായ് വ്യക്തമാക്കി. സെപ്റ്റംബര്‍ നാലിനാണ് റിലയന്‍സ് ജിയോ വെല്‍ക്കം ഓഫര്‍ പ്രഖ്യാപിച്ചത്. ഇതനുസരിച്ച് ഡിസംബര്‍ നാലിന് 90 ദിവസം പൂര്‍ത്തിയാകും.

നിലവില്‍ വരിക്കാരായ എല്ലാവര്‍ക്കും ഡിസംബര്‍ 31 വരെ സേവനം തുടര്‍ന്നും ലഭിക്കുമെന്നുമായിരുന്നു ഇതിനോട് ജിയോ നേരത്തെ പ്രതികരിച്ചിരുന്നത്. എന്നാല്‍ ഡിസംബര്‍ മൂന്നൂ വരെ വരിക്കാരാവുന്നവര്‍ക്ക് മാത്രമേ ഇത് ലഭ്യമാവൂ എന്ന് ജിയോ വ്യക്തമാക്കിയിരുന്നു.